Почитувани,

По повод посетата на Претседателот на Европскиот Совет, Доналд Туск и неговата средба со Претседателот на Република Македонија, Ѓорѓе Иванов, , Претседателот на Македонската Алијанса, Ѓорѓија Џорџ Атанасоски, го соопштува следното:

Пораката на Доналд Туск е кристално јасна. Европската Унија очекува од нас да покажеме политичка зрелост и самите да одлучиме што е најдобро за Евроатланските интеграции на нашата заедничка Татковина. После 25 години независност нашите меѓународни сојузници очекуваат од Македонија и нејзините политички фактори директна потврда за способноста да се справиме со долготрајната политичка криза.

Македонскиот народ секогаш се стремел кон полноправното членство во ЕУ и НАТО. Не случајно тоа се стратешки определби на сите политички партии во Татковината. Сепак, Европската Унија конечно треба да разбере дека заради нивните сопствени системски слабости Македонија е жртва на нерационалните политики и злоупотреба на правата кои произлегуваат од членството од страна на Грција, која иако е осудена од Меѓународниот Суд во Хаг, се уште не се откажува од уцените и блокадите. Ваквите неразумни позиции на официјална Атина, за жал ЕУ предолго ги толерира и го го руши нашиот Европски сон.

Затоа, сметаме дека беше повеќе од неопходно, во услови на ваква чувствителност, највисоките претставници на ЕУ да ја осудат Тиранската платформа како непромислена иницијатива која длабоката политичка криза пост изборно ја измести и префрли на еден крајно опасен терен како меѓуетничките односи. Господата Туск, Могерини и Хан многу добро знаат дека основен причинител на Македонската криза никогаш не беше некаква меѓуетничка нетрпеливост, туку обвиненијата за наводна манипулација со претходните избори и скандалот со прислушувањето. Во политичкиот договор од „Пржино“, ниту една политичка партија не превзема обврска да прифаќа, усвојува и исполнува некаква Платформа на Албански партии, потпишана во Тирана, која со самото објавување кога цел Македонски народ прославуваше Божиќ е чиста провокација и мешање во внатрешните работи на нашата земја.

Македонската Алијанса жали што се повторува Македонскиот синдром. Целата општествено – политичка јавност чека некој друг од надвор да ни ја заврши домашната задача. Ставот на Претседателот Ѓорге Иванов е јасен сигнал дека  политичката криза во Македонија продолжува уште да се продлабочува, тензиите и поделбите во општеството добиваат драматични размери, заради што решението за нормализирање на состојбите и враќање на кредибилитетот на Државните институции станува речиси невозможно без напуштање на максималистичките барања од сите актери на кризата.

Најодговорните Македонски политички партии треба да го запрат сопственото самоуништување, конечно напуштајќи ги тесно партиските интереси за задржување или освојување на власта. Лидерите мора да преземат конкретни дејствија каде без лични калкулации ќе се стават во одбрана на суверенитетот и националниот идентитет на Македонија. Радикалните услови и уцени во Тиранската Платформа мора да се отфрлат бидејќи го загрозуваат унитарниот карактер на Македонија, во спротивност се со Охридскиот Рамковен Договор и ги поништуваат досегашните придобивки од него. Албанските политички партии од Македонија треба самите да се повлечат од Платформата покажувајќи дека можат да се надминат себеси во интерес на заедничката иднина на нашата Македонија.

На домашната, но и на целата меѓународна јавност да и потврдиме дека ниту еден надворешен или внатрешен притисок нема да биде успешен, затоа што ниту една политичка партија, ниту еден лидер или политичар во Татковината никогаш нема да се согласи да преговара или разговара за промена или откажување од најсветото Македонско име и идентитет.

МАКЕДОНСКА АЛИЈАНСА

Претседател,

Ѓорѓија Џорџ Атанасоски