Во врска со вчера објавената Платформа на Албанските партии, дефинирана од нив како услов за формирање на Влада, Претседателот на Македонската Алијанса, Ѓорѓија Џорџ Атанасоски, ја упатува следната
писмена реакција:

Македонската Алијанса ја оценува Платформата на Албанските партии како опасна инвестиција во нови етнички поделби, со умисла ставајќи на преговарачка маса барања кои се насочени исклучиво кон
продлабочување на кризата со катастрофални последици за иднината на Татковината. Платформата беше објавена кога цел Македонски народ прославува Божиќ, што освен е смислена провокација на еден од
најголемите христијански и православни празници, истовремено претставува и свесен обид за долготрајната политичка криза да се префрли на меѓуетничко поле.

Бидејќи картите полека се отвораат, сметаме дека е дојдено крајно време лидерите на најодговорните Македонски политички партии да преземат конкретни, јасни и директни чекори со кои без калкулации и
резерва ќе се стават во одбрана на суверенитетот и националниот идентитет на Татковината и Македонскиот народ.

Дојден е моментот да покажеме дали умееме да се издигнеме над суетите, тесно партиските интереси и на дело да покажеме дека знаеме да се обединиме за иднината на нашата заедничка Татковина.

Првиот фундаментален чекор е единствено и целосно отфрлање на Платформата на Албанските партии која во суштина брутално го гази Охридскиот Рамковен договор и ги потценува сите досегашни придобивки од
него.

Македонските политички партии не смеат да дозволат лидерите на Албанските партии со  „кукавички јајца“ зготвени во Тирана и Приштина, заради тесно партиски и лични цели да манипулираат со чувствата на
нашите сограѓани Албанци. Мешањето во нашите внатрешни прашања од нашите соседи мора јавно да се осуди.

Македонските политички партии треба заеднички да соопштат дека барањето на Албанските партии за целосна еднаквост на двата народа ќе се разговара откако ќе се спроведе попис, кој истите Албански партии
упорно го избегнуваат бидејќи се плашат од резултатот и вистината.

Македонските политички партии мора неодложно да се усогласат и да соопштат дека никој нема по ниту една цена или притисоци да прифати да разговара и преговара за промена на Уставното име и Македонскиот
национален идентитет. Албанските политички партии, чии Министри за волја на вистината, раководеле и со клучните ресори за Евроатланските интеграции на Македонија, ќе имаат легитимитет да бараат
дополнително активно учество во спорот за името со официјална Атина, тогаш кога исто така сложно ќе побараат од Албанија да го признае нашето Уставно име.

Македонските политички лидери треба веднаш заеднички да организираат средби со  нашите сограѓани Албанци и да ги уверат дека ние сме за соживот и сакаме заеднички да ја градиме иднината на Македонија,
на принципиелни основи, со меѓусебна искрена почит и разбирање.

Македонската Алијанса уште еднаш ги повикува најодговорните Македонски политички лидери да бидат на висината на задачата, да бидат целосно свесни за предизвиците со кои се соочува Татковината, и добро
да размислат за секој нивен потег во наредниот период. Секоја нивна евентуална одлука која ќе биде спротивна на националните интереси, ќе се смета за велепредавство на Македонскиот народ, за што прошка
нема да има!