Автори Posts by Игор Мицкоски

Игор Мицкоски

57 POSTS 0 КОМЕНТАРИ

АТАНАСОСКИ ДО ЗАЕВ: ДАЛИ ВО МАКЕДОНСКИОТ ДЕЛ ОД ВЛАДАТА ПОСТОИ ПОЛИТИЧКА ВОЛЈА ЗА ДВОЈАЗИЧНОСТ

Во врска со одлуката на Владата да го усвои Законот за употреба на јазиците, Претседателот на МА, Ѓорѓија Џорџ Атанасоски, ја упатува следната реакција:

Претседателот на СДСМ и актуелен Премиер, Зоран Заев, прекрши уште едно свое ветување, за кое потпиша и писмени гаранции, дека таканаречената Тиранска платформа нема да биде услов за Владината коалиција, ниту пак на било каков начин нема да биде загрозуван Уставниот поредок.

Од каде сега Венецијанската Комисија ќе дава конечно мислење за двојазични амблеми во Армијата на Македонија? Што значи ова, дека во Македонскиот дел од Владата постои политичка воља за ова велепредавство, само се чека алиби за да се спроведе во пракса?

Со кои одредби од Охридскиот Рамковен Договор е предвидено дека во Општините и Градот Скопје каде Албанците формално се водат дека се над 20 проценти треба да има двојазични аблеми на полицијата, пожарникарите и здравствените работници?

Од кога тоа овој Закон стана неопходна реформа за нашите Евроатлански интеграции, за да оди во Собрание со Европско знаме?

Конечно, зошто Владата на Зоран Заев на истата седница на која одлучи Албанскиот речиси да го изедначи со Македонскиот јазик, не донесе одлука да спроведе попис?

Наместо да шират триуфализам за Законот за јазиците, каде се Албанските политички лидери од Македонија да побараат од Владата на Еди Рама да ја признае Македонија под Уставното име? Нели Талат Џафери на Мечкин Камен го цитираше Крушевскиот Манифест?

Македонската Алијанса ги повикува сите најодговорни политички фактори да се разбудат и да го преземат својот дел од одговорноста. Не може Македонија да се раскрчмува, а некој по линија на помал отпор, со несторување да аминува распродавање на Македонските национални интереси! Каде е Претседателот на Републиката, Ѓорѓе Иванов? Нели неговата Претседателска заклетва го обврзува да го штити Уставниот поредок на Татковината?

После Договорот со Бугарија, овој Закон е втор удар за Македонскиот национален идентитет. Со условувања и закани за опстојување на Владата на Зоран Заев, со брутален политички пазар, Албанските политички фактори со силата во Собранието наметнуваат двојазичност на целата територија, што е апсолутно надвор од Охридскиот Рамковен Договор.

Овој Закон не смее да помине по ниту една цена, бидејќи оди во прилог на официјална Атина. Албанските политички профитери заслепени од нивните тесно партиски интереси во пресрет на локалните избори, по Грчки терк, од внатре го напаѓаат Македонскиот национален идентитет. Грчките радикали и иреденти ова го чекаат.

Нашата внатрешна слабост да им создаде можност за да го зададат последниот удар за промена на светото Македонско име и откажување од Македонскиот национален идентитет.

 

Доколку овој Закон за употреба на јазиците помине во Македонското Собрание и ВМРО ДПМНЕ и СДСМ ќе си ја понесат целата одговорност. Прочка нема веќе!

Единствениот Македонски Градоначалник во Албанија, Едмонд Темелко, не може да ги брани интересите на своите браќа и сестри Македонци,затоа што остана без пасош, додека амнестирани за Хашките случаи облечени во политичко руво сега и кројат капа на Татковината!

Доста беше!

Не може на најодговорните политички фактори да им се подраги фотељите и функциите од Македонската Држава и Народ!

Писмена реакција на провокацијата на Красимир Каракачанов

Почитувани,

Во врска со интервјуто на Бугарскиот Министер за одбрана Красимир Каракачанов кој за нивен медиум во Скопје провокативно изјави дека Илинден е Бугарски празник, Претседателот на Македонската Алијанса, Ѓорѓија Џорџ Атанасоски ја упати следната реакција:

Македонската Алијанса најостро ја осудува провокацијата на Красимир Каракачанов кој среде Скопје, триумфалистички ја повтори својата позната идентентистичка и националистичка реторика. Не издржа ни еден ден, а Бугарската Влада веќе го прекрши Договорот за Добрососедство. Красимир Каракачанов не е од вчера и како актуелен Министер за одбрана во Владата на Бојко Борисов точно знае какви последици ќе предизвика неговата провокација.

Гоце Делчев и Даме Груев ќе станат Бугари тогаш кога Красимир Каракачанов ќе докаже дека на Марс има Бугарска колонија. Ниту “Илинден” е Бугарски празник, ниту ние имаме заедничка историја со нив. Македонија и Македонскиот народ, особено за време на Втората светска војна, беа на вистинската страна, на фронтот за слобода и правда, се бореа против фашизмот, и заради тоа беа жртва на Бугарската окупаторска војска. Тоа е еден од најпрецизните историски факти дека Македонците и Бугарите не се и никогаш не биле ист народ.

Бараме од Владата на Зоран Заев и Радмила Шекеринска веднаш да ја осудат провокацијата на Красимир Каракачанов и да побараат од Бугарскиот Премиер Бојко Борисов веднаш да се огради од ваквиот став на неговиот Министер за одбрана.

Министерот за надворешни работи Никола Димитров да го прогласи за “персона нон грата” и да му забрани влез во Македонија. Ако Грчките погранични власти можеа мене, со Американски пасош, да ми забранат влез, само заради тоа што сум Македонец, Владата може да ги заштити своите национални интереси и веднаш да му забрани влез на еден Каракачанов кој во Македонија, каде беше примен со сите Државни почести, се обиде да не понижи како народ.

Министерката за одбрана Радмила Шекеринска да се заблагодари и веднаш во знак на протест да ја испрати назад во Софија сета воена помош што ја доби Македонија за справување со пожарите. Се додека Красимир Каракачанов е Министер за одбрана на Бугарија не прифаќаме никаква пнатамошна соработка.

Македонслата Алијанса ја повикува ЕУ и НАТО Алијансата да реагираат на оваа провокација на Министер на нивна земја членка, бидејќи со вакви потези се рушат сите принципи и вредносни стандарди на кои почиваат овие сојузи.

Дрскиот однос на Красимир Каракачанов е доказ дека бевме во право дека Бугарските власти немаат искрен пристап во обидот да се затворат отворените прашања што ги оптеретуваат нашите билатерални односи со децении. Во спротивно, со Договорот експлицитно ќе го признеа Македонскиот национален идентитет и ќе прифатеа обврскс да ги спроведат пресудите на Европскиот Суд за човекови права и да го регистрираат ОМО Илинден-Пирин.  Со ваков Договор Македонија  попушта несразмерно многу и прифаќа одредби со кои си пука директно во нога нанесувајќи огромна штета на своите меѓународни позиции.

Македонската Алијанса уште еднаш предупредува дека евентуалната ратификација на ваков Договор ќе и даде дополнително погонско гориво на официјална Атина да ни го зададе последниот удар, со аргументација дека ние самите сме се откажале од нашиот национален Македонски идентитет.

Затоа, доколку Договорот за добрососедски односи со Бугарија, во ваква форма на сила се ратификува во Собранието, Македонската Алијанса со сите политички средства ќе се бори Македонија еднострано да го раскине Договорот, повикувајќи се на членот 13, точка 3.

Македонскиот народ со своето отсуство на Мечкин Камен на прославата на Илинден покажа дека нема да дозволи ниту пак да прости велепредавство, без разлика дали се прави со сторување или лажно противење.

 

МАКЕДОНСКА АЛИЈАНСА

Претседател,

                                                                                 Ѓорѓија Џорџ Атанасоски

Обраќање по повод 2-ри Август – Илинден  

 

Почитувани,

 

По повод прославување на 114 години од Илинденското Востание и 73 години од Првото заседание на АСНОМ што се одржа во манастирот „Прохор Пчински“, Претседателот  на Македонската Алијанса, Ѓорѓија Џорџ Атанасоски, со писмено обраќање упатува честитка до граѓаните на Република Македонија и до сите Македонци ширум Светот:

 

Драги браќа и сестри,

 

Без разлика на сериозните предизвици со кои се соочуваме веќе подолг период, историските дилеми и лажното толкување на фактите кои ни се наметнува со притисоци и закани за нашата иднина, ние како горд и достоинствен Македонски народ никогаш не смееме да заборавиме дека „Илинден“ е еден од нашите најголеми Македонски празник,  Денот на Републиката, Светиот датум на Првото заседание на АСНОМ, Денот по кој отсекогаш се одредувала Македонската историја, и тоа, на времето пред двата Илиндена, кога Македонија била под ропство, и на времето после двата Илиндена, кога Македонскиот народ храбро и одважно го дигна својот глас и ја извојува долгоочекуваната слобода.

 

Затоа, со голема гордост сакам да Ви го честитам 2-ри Август, „Илинден“ и од името на целата Македонска Дијаспора да Ви порачам да продолжиме да бидеме горди на нашето минато и исправено да чекориме по патот кој нашите претци ни го трасираа и се бореа за да живееме достоинствен живот во нашата Татковина како демократска, независна и унитарна Држава.

 

Знам дека многумина од Вас деновиве чувствуваат горчина и пелин во душите. Многумина ми пишуваа и се јавуваа да побараат од мене помош, некој да стави крај на сите обиди за наше понижување како народ.

 

Македонија низ историја поминала безброј премрежја, разни окупаторски сили се обидувале да не угнетат, да не присвојат, асимилираат за да исчезне нашиот Македонски идентитет, јазична и културна посебност. Политиката на одредени елити кај соседите никогаш до крај не била искрена кон нас. Сакаат да не месат како тесто и да не моделираат по нивни терк. За жал, не ретко, во овие свои намери, си наоѓаат соработници и меѓу нашите општествено политички фактори.

 

Но Македонија и Македонскиот народ, никогаш не потклекна. Колку ударите се посилни, ние Македонците уште пожестоко опстојуваме и со го браниме своето. Можат уште 100 патти да не’ ни дозволуваат да одиме во „Прохор Пчински“, но никогаш не можат да ни го одземат АСНОМ. Ниту еден Договор за добрососедство не може да ја смени реалноста. Македонија и Македонскиот народ за време на Втората светска војна беа на вистинската страна, на фронтот за слобода и правда, се бореа против фашизмот, и заради тоа беа жртва на Бугарската окупаторска војска. Тоа е еден од најпрецизните историски факти дека Македонците и Бугарите не се и никогаш не биле ист народ. Бадијала заедничко славење, бадијала тврдење дека имаме заедничка историја, бадијала издавање на Бугарски пасоши во Пустец, Мала Преспа, Голо Брдо, Гора во Албанија, Македонскиот народ никогаш нема да биде жртва на политички одлуки! Кој што сака нека потпишува, Македонија никогаш нема да се откаже од своите браќа и сестри Македонци кои живеат надвор од границите на Републиката. Ниту ние, ниту генерациите кои доаѓаат, не можат да ја избришат историската неправда која ни беше направена со Букурешкиот Договор. Сакаме добрососедски односи, но на принципилена основа, без уцени и барања чие исполнување оди на наша штета. Сите обиди за велепредавство на Македонските национални интереси од актуелните Македонски политички фактори ќе будат пресретнати од Македонскиот народ!

 

Ние никогаш нема да се согласиме да попуштиме под уцените на официјална Атина и да се откажеме од сопствениот Македонски идентитет и светото вековно име Македонија! Сакаме да станеме полноправен член на ЕУ и НАТО Алијансата но врз основа на принципите на меѓународното право и правда.

 

Македонски народе,

 

Ние мора да продолжиме посветено да работиме, секој во рамките на своите можности, во изградбата на една модерна и просперитетна држава која никогаш нема да ги заборави својата култура и традиција.

 

На оние кои се обидуваат да ни наметнат историја со други корени да им порачаме дека Македонија е вечна и исконска земја, да се биде Македонец е нешто свето и тоа никогаш нема да можете да ни го земете.

 

Наша заедничка патриотска должност е да се избориме за силна, стабилна, просперитетна и обединета Македонија! Тоа е наследството од нашите претци и нашиот влог за генерациите Македонци кои доаѓаат.

 

Како што Македонците беа обединети за време на Илинденското востание, денес нашата патриотска должност повторно не повикува да бидеме сложни и решителни за одбрана на нашата Македонска историја и нашата сигурна иднина во која нема да влеземе обезличени, откажани од нашиот Македонски идентитет и променето свето име Македонија!

 

 

Нека ни е честит 2-ри Август! Нека ни е вечна Татковината!

 

 

МАКЕДОНСКА АЛИЈАНСА

 

Претседател,

                                                                                       Ѓорѓија Џорџ Атанасоски

МАКЕДОНСКА АЛИЈАНСА: ПОТПИШУВАЊЕТО НА ДОГОВОРОТ ЗА ДОБРОСОСЕДСТВО НЕГАТИВНО ЌЕ СЕ ОДРАЗИ ВРЗ МАКЕДОНСКИТЕ НАЦИОНАЛНИ ИНТЕРЕСИ

Во врска со контроверзната содржина на договорот за пријателство, добрососедство и соработка со Бугарија, Претседателот на Македонската Алијанса, г-динот Ѓорѓија Џорџ Атанасоски го соопштува следниот став:
Почитувани, Македонската Алијанса изразува загриженост заради контроверзната содржина на договорот за пријателство, добрососедство и соработка со Бугарија и сметаме дека потпишувањето, како и евентуалната ратификација со моменталната содржина негативно би се одразило врз Македонските национални интереси, но и на унапредување на долгорочните односи помеѓу Македонија и Бугарија.
Македонската Алијанса ги подржува сите иницијативи за унапредување и градење на
добрососедски односи, но тоа мора да биде на принципиелна основа. Бугарија е наш важен сосед кој прв ја призна Македонија под Уставното име, ја подржува унитарноста на земјата и дава поддршка на нашите Евроатлански интеграции, но сепак имаме отворени прашања кои ги оптоваруваат нашите билатерални односи со децении.
Македонската Алијанса уште еднаш предупредува дека секоја евентуална согласност за неко спорни одредби од таканаречениот Договор за добрососедски односи со Бугарија, со кои ќе се оспорува посебноста на нашата Македонска култура, јазик и идентитет, ќе значи дека самите се откажуваме од нашиот национален идентитет.
Ниту еден политичар или партија не може да прифаќа и да ветува остварување на нешто што не е, и не може да биде прифатливо за Македонскиот народ. Секој кој ќе тргне контра на ова основно демократско начело, се обиде да стори велепредавство, ќе мора да сноси одговорност  за своите неразумни постапки.
Членот 11 од договорот е спротивен на Членот 49 од Уставот на Република Македонија со што се отвора можност овој договор подоцна да биде изваден пред Уставниот суд и поништен по потпишувањето, создавајќи меѓународен скандал. Во овој член нашата Татковина е условена да не се меша во внатрешните работи на Бугарија, но истиот услов не е поставен и за Бугарија. Во овој случај, Македонија отстапува од борбата за културните и човековите права на Македонското малцинство во Бугарија, што е крајно неприфатливо.
Договорот мора да предвидува обврска за Бугарските власти да ги испочитуваат меѓународните норми, особено пресудите на Европскиот суд за човекови права кои ги третираат Македонците кои живеат таму. Ние не можеме да бараме од нашите меѓународни сојузници да ја спроведат пресудата на Меѓународниот Суд во Хаг за противправното Грчко вето во Букурешт, ако самите, во други случаи се откажуваме од меѓународната правда за фундаменталните демократски права на
Македонскиот народ.

Во Договорот, Македонија не може да превземе обврска за менување на историските факти. Македонија и Македонскиот народ за време на Втората светска војна беа на вистинската страна, на фронтот за слобода и правда, се бореа против фашизмот, и заради тоа беа жртва на Бугарската окупаторска војска. Тоа е еден од најпрецизните историски факти дека Македонците и Бугарите не се и никогаш не биле ист народ.
Уште по поразително е тоа што во времето на премиерот Ѓорѓи Димитров уште во далечната 1948
година се признаваше Македонскиот народ а сега истиот е вешто изоставен од договорот. Како е тоа можно? Зарем Македонскиот народ во Бугарија исчезна? Дополнително друго прашање е третирањето од страна на Република Бугарија на зборот Македонец како географски а не како национален поим.
Македонската Алијанса уште еднаш предупредува дека секоја евентуална согласност за некои спорни одредби од таканаречениот Договор за добрососедски односи со Бугарија, со кои ќе се оспорува посебноста на нашата Македонска култура, јазик и идентитет, ќе значи дека самите се откажуваме од нашиот национален идентитет, што ќе ја отвори можноста за официјална Атина да ни го зададе последниот удар.
Македонскиот народ нема да дозволи велепредавство, без разлика дали ќе се направи со сторување или лажно противење. Доста е од политички игри и манипуации!

МАКЕДОНСКА АЛИЈАНСА
Претседател,
Ѓорѓија Џорџ Атанасоски

Писмена реакција за објавениот Договор за добрососедски односи со Бугарија

Почитувани,

 

Во врска со вчерашната прес конференција, на која Премиерот Зоран Заев го објави од Владата усвоениот текст на Договор за добрососедски односи со Бугарија, Претседателот на Македонската Алијанса, Ѓорѓија Џорџ Атанасоски, ја упатува следната реакција:

 

Според основните меѓународни стандарди во надворешната политика главната цел на секој билатерален договор е да реши одредени отворени прашања и проблеми меѓу двете Држави кои се решиле на таков потег. Клучното прашање е дали вака срочен, Договорот за добрососедски односи ги затвора сите нерешени прашања кои со децении ги усложнуваат односите меѓу Македонија и Бугарија? Ајде да одиме по ред!

 

Прво, дали овој Договор содржи одредби со кои Бугарија го прифаќа постоењето на Македонскиот народ и ја признава посебноста на Македонскиот јазик? НЕ, текстот на Договорот е завиткан во допадлив дипломатски речник, но во неговата суштина е вметната формулацијата „Македонски јазик согласно Уставот“ која потврдува дека позициите на Бугарските власти не се променети по ова прашање ниту за милиметар во последните 18 години.

 

Второ, дали овој Договор е чекор напред за Македонија кон полноправно членство во ЕУ и НАТО Алијансата? НЕ, напротив, во членот 2, точка 2, со формулацијата „ќе ја поддржи Македонија за добивање на покана за членство во НАТО согласно соодветните одлуки од средбите на врвот на НАТО“, всушност Бугарија застанува зад Букурешкото вето на Грција од 2008, според кое без променето име Македонија не може да стане полноправен член на Алијансата.

 

Трето, дали овој Договор ја обврзува Бугарија да ги спроведе пресудите на Европскиот Суд за човекови права кои се однесуваат на Македонците кои живеат таму? НЕ, Бугарија и после овој Договор, повторно нема да го регистрира ОМО Илинден – Пирин, ниту ќе им овозможи на нашите браќа и сестри Македонци кои живеат таму да ги уживаат основните демократски права.

 

Конечно, дали овој Договор е решение кое трајно ги отстранува сите пречки меѓу нас? НЕ, во членот 12, точка 2 од Договорот, се определува обврска за формирање заедничка меѓу владина Комисија која еднаш годишно ќе прави контрола како се спроведуваат преземените обврски. Со оглед на фактот дека Владата на Зоран Заев и Никола Димитров си презела обврски да спречува создавање на анти – Бугарско расположение во Македонија од медиуми, Државни институции или физички лица, да ги шминка учебниците по историја и заедно да слави празници со Бугарски претставници, Владата на Бојко Борисов си го задржува правото и после ратификацијата на Договорот да ја блокира Македонија на Евроатланскиот пат. Тоа значи дека ако некој на пример во Скопје ја скрши противправно поставена плоча на Мара Бунева за време на панихидата на која редовно провоцира Красимир Каракачанов, Бугарија може да оцени дека Договорот не се спроведува соодветно!

 

Македонската Алијанса ги подржува сите иницијативи за унапредување и градење на добрососедски односи, но тоа мора да биде на принципиелна основа. Бугарија е наш важен сосед кој прв ја призна Македонија под Уставното име, но сепак ние не можеме да отстапиме од  стратешки позиции и интереси на Македонскиот народ. Бугарската Влада мора јасно, недвосмислено и формално да го признае Македонскиот национален идентитет. Истовремено, Македонија не може да бара од нашите меѓународни сојузници да ја спроведат пресудата на Меѓународниот Суд во Хаг за противправното Грчко вето во Букурешт, ако самите, во конкретниот случај со Договорот за добрососедски односи со Бугарија, се откажуваме од меѓународната правда за фундаменталните демократски права на Македонскиот народ. Во Договорот, Македонија не може да превземе обврска за менување на историските факти. Македонија и Македонскиот народ за време на Втората светска војна беа на вистинската страна, на фронтот за слобода и правда, се бореа против фашизмот, и заради тоа беа жртва на Бугарската окупаторска војска. Тоа е еден од најпрецизните историски факти дека Македонците и Бугарите не се и никогаш не биле ист народ.

 

Земајќи предвид дека спротивно на сите негови заложби и ветувања, Премиерот Зоран Заев не дозволи дебата, туку Договорот за добрососедски односи со Бугарија го промовираше како конечно усогласен текст усвоен од неговата Влада, Македонската Алијанса уште еднаш предупредува дека евентуалната ратификација на ваков Договор ќе и даде дополнително погонско гориво на официјална Атина да ни го зададе последниот удар, со аргументација дека ние самите сме се откажале од нашиот национален Македонски идентитет. Затоа, доколку Договорот за добрососедски односи со Бугарија, во ваква форма на сила се ратификува во Собранието, Македонската Алијанса со сите политички средства ќе се бори Македонија еднострано да го раскине Договорот, повикувајќи се на членот 13, точка 3.

 

Ниту еден политичар или партија не може да прифаќа и да ветува остварување на нешто што не е, и не може да биде прифатливо за Македонскиот народ. Секој што тргнува спротивно на оваа елементарна политичка логика ќе мора да преземе одговорност за своите неразумни постапки.

 

МАКЕДОНСКА АЛИЈАНСА

Претседател,

                                                                                Ѓорѓија Џорџ Атанасоски

Соопштение за јавност за трилатералната средба во Солун

По повод трилатералната средба меѓу домаќинот Алексис ЦипрасАлександар Вучиќ и Бојко Борисов, која се одржа во Солун и каде тема беше и Македонија, Претседателот на Македонската Алијанса, Ѓорѓија Џорџ Атанасоски, го соопштува следното:

Владата на Република Македонија не може да остане рамнодушна на трилатералната средба која се одржа во Солун, каде за жал претставник од нашата Татковина не беше поканет. Ако ова е еден од првите плодови од „новата конструктивност“ на надворешната политика на Премиерот Зоран Заев и Министерот Никола Димитров, тогаш лошо и се пишува на Македонија и Македонскиот народ. Новата власт во Македонија не може да биде селективна и да има слух само за убаво спакуваните дипломатски кованици кои доаѓаат од соседите, а за провокациите да промовира „твитер реакција“.

Што се случи после посетата на Софија, поклонувањето пред провокативниот Бугарски споменик на Цар Самоил, изјавите за заедничко славење на Илинден, подготвеноста на новата Влада за промени во Македонските учебници по историја, каењето за поврзувањето на Македонците со античката историја, најавите дека е усогласен текстот на Договорот за добрососедство со Бугарија и дека ќе се потпише на 2-ри август? Што се случи после телефонскиот разговор Заев – Ципрас и посетата на Атина и средбата КоsиасДимитров?

Вчера, среде Солун, истите актери од времето на Букурешкиот Договор, после 104 години, јасно ни даваат до знење дека за нив е прифатлива само стабилна Македонија со решен спор за името со Грција, ако сме сакале да продолжиме на патот на нашите Евроатлански интеграции. Па кој ја дестабилизира Македонија, ако не национализмот на соседите и нивната чудна потреба да бидат наши патрони? Српскиот Претседател Вучиќ, не само што не се оградува од изјавата на Дачиќ, туку јавно ја поддржа и ја оправда со некаков реципроцитет. Го слушна ли некој Борисов да изрази несогласување со ваквите изјави? Нели Бугарија како членка на ЕУ и НАТО јавно прокламираше дека ќе биде покровител на Македонија на нејзиниот Евроатлански пат. Наместо поддршка, во Софија секој ден фрчат провокации кон нас, како онаа на поранешниот Претседател на Бугарија Петар Стојанов кој изјави дека Илинден е нивно второ Априлско востание, а Македонија според него е најромантичен дел од нивната историја.

Додека Владата реагира на твитер, на Македонија и се крои капа и се соочува со сериозни предизвици од сите страни. Колку повеќе демонстрираме конструктивност толку повеќе ни се зголемуваат проблемите. Затоа, на Македонија и е доста од двоен морал и лажни пријатели. На Македонија не и врши работа претерана конструктивност и виткање на кичмата. Од досегашната историја, јасно е дека сите наши отстапки биле залудни затоа што Македонија е се уште во чекалната на ЕУ и НАТО Алијансата.

Сега е време за сеопфатен и цврст национален консенсус за стратешките национални интереси. Македонските политички фактори, особено ВМРО ДПМНЕ и СДСМ, треба да се отрезнат и да престанат да бидат заробеници на нивните дневно – политички интереси. Или ќе ги надминат личните суети и заедно на целата меѓународна јавност конечно ќе и соопштат дека без разлика на сложените внатрешни политички односи, ниту една политичка партија, ниту еден лидер или политичар во Македонија никогаш нема да се согласи да преговара или разговара за промена или откажување од најсветото Македонско име и идентитет, или ако се дрзнат да направат велепредавство ќе мора да се соочат со народниот гнев и незадоволство. Меѓусебните обвинувања за криминал и корупција нека остават да ги решаваат правосудните органи. Македонија не може да биде жртва на безосетноста на актуелните Македонски политички фактори кои заслепени од борбата за моќ, влијание и власт, забораваат што е нивна обврска и должност.

Македонската Алијанса уште еднаш ја повикува Владата на Република Македонија да биде внимателна со потезите кои ги влече во надворешната политика и односите со соседите. Никој во Македонија нема мандат да влегува во ризици и да го загрозува Македонскиот национален идентитет. Било каков Договор кој евентуално ќе биде на штета на Македонскиот народ и ќе ја доведува во прашање иднината на нашата заедничка Татковина нема да помине.

МАКЕДОНСКА АЛИЈАНСА

Претседател,

                                                                                         Ѓорѓија Џорџ Атанасоски

Соопштение за изборот на нова Влада на Република Македонија

Почитувани,

 

По повод изборот на нова Влада на Република Македонија, Претседателот на Македонската Алијанса, Ѓорѓија Џорџ Атанасоски, го соопштува следното:

 

Македонската Алијанса смета дека изборот на нова Влада конечно треба да го означи првиот чекор за излез од долготрајната внатрешна политичка криза. На ново избраните функционери им го честитаме изборот и им пожелуваме да ги обавуваат своите должности исклучиво во интерес на Татковината. Македонската Дијаспора будно ќе ги следи процесите, добрите одлуки ќе ги подржува, на сите евентуално погрешни чекори ќе се спротиставува и остро ќе ги критикува.  Впрочем, тоа е наша демократска должност во интерес на Македонските генерации кои доаѓаат, и која гордо и достоинствено ја обавуваме повеќе од 26 години.

 

Земајќи предвид дека во пресрет на изборот на нова Влада оркестрирано се зголемуваа очекувањата дека доаѓа времето за решение на повеќе деценискиот наметнат спор за името од нашиот јужен сосед, а од вчера се огласи и Коsиас кој најавува средба со Димитров, сметаме дека е неопходно веднаш да предупредиме на неколку работи.

 

Новото парламентарно мнозинство има поддршка и доверба од 62 пратеници за да избере нова Влада на Република Македонија, кадровскиот избор да го изврши врз сопствени проценки за најефикасно спроведување на нивните ветувања и политики, но како и никоја друга Влада претходно, нема ниту право ниту легитимитет да ветува или да влегува во некакви аранжмани за промена на Уставното име. Македонија и Македонскиот национален идентитет му припаѓа на Македонскиот народ кој дава или зема мандат на политичарите во зависност од тоа дали тие работат во нивен интерес или не!

 

Ние силно веруваме дека стратешки колосек за нашата заедничка Татковина е членството во ЕУ и НАТО Алијансата, но не по секоја цена. Очекувањата за експресно обезбедување на полноправно членство во НАТО може да биде втемелено само врз основа на гаранции од нашите меѓународни сојузници дека ќе обезбедат спроведување на пресудата на Меѓународниот Суд во Хаг со која официјална Атина е осудена за бесправна блокада на Македонија. Сите други очекувања за некакво брзо решение кое ќе значи промена на Уставното име и откажување од Македонскиот национален идентитет, е туѓ есап без крчма!

 

Ниту оваа, ниту било која идна Влада не може и не смее да се согласи да направи велепредавство на сопствениот народ! Преговори за името не може и нема да има!

 

Македонската Алијанса останува посветена на Татковината и интересите за обезбедување на сигурна иднина за народот и врз тие принципи доследно, чесно и бескомпромисно ќе продолжи да се бори за зачувување на Македонски национален идентитет и Уставното име.

 

 

МАКЕДОНСКА АЛИЈАНСА

Претседател,

                                                                                 Ѓорѓија Џорџ Атанасоски

Соопштение за јавност за интервјуто на Метју Нимиц за Грчкиот неделник „Ријал Њуз“

Почитувани,

 

Во врска со интервјуто на медијаторот Метју Нимиц, кој за Грчкиот неделник „Ријал Њуз“ изјавил дека очекува после изборот на новата Влада во Македонија да започнат сериозни разговори за решавање на спорот за името, Претседателот на Македонската Алијанса, Ѓорѓија Џорџ Атанасоски, го соопштува следното:

 

Македонската Алијанса веќе долг период јавно предупредува дека постои сериозна опасност долготрајната политичка криза да биде злоупотребена за задавање на последниот удар кон обезличување на нашата Татковина. Сметаме дека таканаречената „Тиранска платформа“ е многу опасен проект кој треба од внатре да го нападне и оспори нашиот Македонски национален идентитет како вовед во евентуалното решавање на спорот за името по Грчки терк.

 

Последното интервју на Метју Нимиц упатува на заклучокот дека Македонија е во крајно чувствителна фаза за својата иднина. Воопшто не е случајно што смислено се зголемуваат очекувањата а со тоа и притисокот на новата Влада во најава дека е потребно брзо решение за името за да се остварат нашите Евроатлански аспирации.

 

За жал, и покрај нашите добронамерни апели, најодговорните Македонски политички партии, заради теснопартиските интереси да се задржи или освои власта, не успеаа да изградат консензус за стратешките национални прашања, заради што Татковината може да влезе во уште подлабока криза.

 

Македонската Алијанса смета дека во изминативе 26 години од независноста, Македонија покажа огромна конструктивност и сериозност во напорите да изнајде разумен пристап во билатералните односи со официјална Атина. Направивме огромни отстапки, а Грчките политички елити во ниту еден момент не пропуштаат да соопштат дека никакви меѓународни притисоци нема да ги сменат Грчките црвени позиции во спорот за името упорно спроведувајќи ја својата стратегија со уцени и притисок да го бараат од нас невозможното.

 

Македонија и Македонскиот народ не бараат подароци, туку остварување на универзалното демократско право на самоопределување кое и припаѓа на секоја земја членка на ООН.

 

Македонија и Македонскиот народ бараат нашите меѓународни пријатели и сојузници да го обезбедат спроведувањето на пресудата на Меѓународниот Суд во Хаг со што нашата Татковина ќе стане полноправен член на НАТО Алијансата и со тоа во прва фаза ќе се обезбеди стабилност во регионот. Особено што најдобра гаранција за унитарноста на Македонија и нејзината долгорочна стабилност е членството во НАТО.

 

Нова Влада која во овој период презема огромен дел од одговорноста за иднината на нашата заедничка Татковина мора уште од сега да знае дека огромното мнозинство на Македонскиот народ во Републиката и надвор од границите има цврсто и непоколебливо изграден став дека разговори и преговори за прифаќање на предлози на промена на Уставното име нема и не може да има, бидејќи секој кој евентуално би се нафатил на такво велепредавство ќе мора да си ја прифати и казната од народот.

 

Новата Влада треба да бидат целосно свесна за предизвиците со кои се соочува Татковината, и добро да размислат за секој нивен потег во периодот што следува. Македонскиот народ нема намера да прифаќа нови понижувања кои ќе го загрозат вековното име Македонија и Македонскиот национален идентитет.

 

 

 

МАКЕДОНСКА АЛИЈАНСА

Претседател,

                                                                                 Ѓорѓија Џорџ Атанасоски

Соопштение за јавност за локалните избори

Земајќи предвид дека денес истекува мандатот на локалните власти, а сеуште не е изнајдено решение како ќе се надмине овој нов вакуум, Претседателот на Македонската Алијанса, Ѓорѓија Џорџ Атанасоски, го соопштува следното:

Изразуваме загриженост што Македонија влегува во нова криза како последица на блокирањето на локалните власти, заради што повторно најдебелиот крај ќе го извлечат граѓаните. Децентрализацијата ги направи Општините директен и непосреден сервис во многу чувствителни сфери како преучилишната едукација и образованието, кои сега влегуваат во тотална неизвесност.

Толкувањата за тоа што можат а што не можат Општините да превземаат во ваква ситуација се хаотични бидејќи и надлежните институции на централно ниво немаа единствен став за ова прашање, ниту пак соопштуваат какви се последици не чекаат.

Истовремено, како по обичај парламентарните партии и за ова прашање се заглавени во своите ровови и продолжуваат меѓу себе да си ја префрлуваат одговорноста за оваа ситуација. Не може да се избегне впечатокот дека новото декларирано мнозинство за прашањето на локални избори промовира двојни аршини, купувајќи време за нивно одлагање на подолг рок.

Жалиме што најодговорните политички партии немаа слух да го прифатат нашиот апел, во овие моменти на сериозни предизвици за Татковината, да договорат принципи за политичко делување чие прифаќање ќе значење најширок можен општествено-политички консензус за стратешките прашања, без разлика на политичка, верска или етничка припадност, што секако ќе ги релаксираше состојбите, бидејќи само така немаше воопшто да биде важно кој ќе биде власт или опозиција или кој каква функција ќе извршува. Вака, никој не може да избега од впечатокот дека сите се водат од своите лични и тесно партиски интереси. Дури и решението кога ќе се закажат локалните избори зависи од проценките на партиите кога тие процениле дека повеќе им одговора за да добијат повеќе гласови.

Македонската Алијанса ги повикува парламентарните партии да престанат со понижување на Уставот, законите и процедурите. Се знае дека мандатот на Градоначалниците и советниците е 4 години, ниту час, ниту ден повеќе. Македонија мора да има локални избори час поскоро, бидејќи секое ново хибридно, неприродно и наметнато решение ќе значи повторно газење на правната Држава.

Народот е уморен од суетите на политичарите и нивните лични калкулации и комбинаторики, бидејќи сака решение за секојдневните проблеми и сигурна иднина за Татковината.

Писмена реакција за објавата на изборот на Т.Џафери во Службен весник на РМ

Во врска со вчерашната објава на Одлука за избор на Талат Џафери за Претседател на Собранието на Република Македонија, во Службен весник на РМ, со што неговиот мандат стана официјален, Претседателот на Македонската Алијанса, Ѓорѓија Џорџ Атанасоски, ја упатува следната писмена реакција:

Клопчето почна полека да се одмотува! ВМРО ДПМНЕ и СДСМ, освен што си го имаа „кабаетот“ од претходно, сега се легитимираа и како соучесници во политиките на Албанските фактори за понижување и провоцирање на Македонскиот народ.

Фактите од поновата Македонска историја не можат да се избришат.

СДСМ го промовираше Талат Џафери во заменик министер за одбрана во 2004 година и покрај тоа што истиот за време на воениот конфликт, непосредно после масакрот кај „Вејце“, дезертираше од АРМ и премина во ОНА, нарекувајќи се „Командант Форина“ што неминовно упатува на претпоставката дека имал командна одговорност за вооружените дејствија против припадниците на Македонските безбедносни сили.

Во 2013, ВМРО ДПМНЕ го изгласа Талат Џафери за Министер за одбрана и покрај жестоките реакции на Македонската јавност, кој не заборавија дека само Љубе Бошковски и Јохан Тарчулоски беа осудени за воени злосторства во Хаг, а ниту еден припадник на терористичката ОНА не беше изнесен пред лицето на правдата, како одговорен за 75-те Македонски бранители кои го дадоа својот живот за одбрана на Татковината.

И тоа не беше доволно, па СДСМ пред десетина дена мораше да го прифати и заедно со ДУИ на каубојски начин да го изгласа Талат Џафери за Претседател на Собранието на Република Македонија. Истовремено, со вчерашната објава на одлуката за избор на Талат Џафери во Службен весник, ВМРО ДПМНЕ по линија на помал отпор го легитимира и прифати ова ново понижување на Македонскиот народ.

Од вчера, паднаа во  вода сите обвинувања дека постои некаков меѓународен заговор или црно сценарио против Македонија, дека наводно ни ја кројат капата и ќе ни ја растурат Татковината. Кога двете најголеми Македонски партии не знаат да го одбранат достоинството на својот народ, тогаш не може никој од надвор да ни биде крив што не знаеме како се чува и брани Македонија.

Основата за денешното понижување на Македонскиот народ лежи меѓу другото во одлуката донесена во 2011 година, кога мнозинството во тогашниот состав на Македонското Собрание заради политички пазар изгласа амнестија за таканаречените Хашки случаи и со тоа ги ослободија од одговорност терористите од ОНА. За овој срамен чин за сите инволвирани политичари фактурата допрва ќе стигнува. Браќа и сестри Македонци кој ни е крив сега кога меѓународната заедница го признава Талат Џафери? За ова некој ќе одговара!

Да бидеме прецизни, ние не сметаме дека во Македонија нема Албанци кои со својата биографија и искуство можат достоинствено и во заединчки интерес да ја обавуваат оваа многу важна Државна функција, но е крајно дрско и понижувачки да се прифати провокацијата и ултиматумот, токму Талат Џафери да биде Претседател на Собранието, кој со поставувањето на Албанското знаме, првиот ден после влегувањето во кабинетот, само потврди дека „волкот“ го менува крзното но не и карактерот.

Македонската Алијанса во овие тешки и чувствителни моменти на своите браќа и сестри Македонци ширум светот секојдневно испраќа пораки на охрабрување. Во овој период на искушенија и предизвици мора да се однесуваме достоинствено и да ја држиме главата горе!

Во Македонија се уште има политичари кои знаат како се работи во интерес на сопствениот народ, обезбедувајќи стабилна иднина и остварување на стратешките интереси на нашата заедничка Татковина.

Бог да ја чува Македонија!

 

 

МАКЕДОНСКА АЛИЈАНСА

Претседател,

                                                                                 Ѓорѓија Џорџ Атанасоски